中環出更：無人店難做 黃銳華：科技唔識賣口乖
借助科技嚟做生意，已經係無可避免嘅大趨勢。卓妮早前見到國際青年商會香港總會（總會）副會長黃銳華，佢話注意到內地有企業家曾不惜重金投資於無人零售店，然則近來盛傳鎩羽而歸嘅消息。
黃銳華分析，話無人零售店無論運用幾多科技元素，實質都係自助服務，而自助服務嘅銷售效果，始終都及唔上買賣雙方面對面交流咁理想。佢舉例，街市檔販都會稱呼顧客為「靚仔」或「靚姐」，又話定當為顧客挑選上等貨色，顧客明知對方係「落嘴頭」，亦會相當受落從而促成交易。至於幫襯無人零售店嘅顧客好多都係基於「貪新鮮」嘅心理，加上科技唔識得「賣口乖」，顧客嘅「回頭率」難免偏低，但服務單一嘅營運模式如自助洗衣，就好適合採用無人店經營。
黃錦成：網絡推銷考文字功力
當晚係維多利亞青年商會新一屆董事會嘅就職晚會，好多賓客都恭賀陳盈盈出任會長。同場嘅嘉賓仲有香港鐘表業總會顧問黃錦成，佢話傳統嘅銷售方式係售貨員理解顧客嘅需要，繼而推介迎合對方嘅產品，然而進入網購嘅世界，就倒過來係消費者喺網絡物色符合自己需要嘅產品，因此現今做生意唔單止產品外觀要引人注目，亦好考經營者嘅文字功力，點樣將產品特色描述得逼真傳神，而自助服務嘅先驅，佢認為係銀行櫃員機。
國際青年商會香港總會前會長何耀雄就話銀行當年一推出櫃員機，就意味銀行業發展朝向無人化嘅方向，至於香港即將出現嘅虛擬銀行，因省卻分行舖租，利息方面會具有優勢。佢相信本地傳統銀行為迎接虛擬銀行嘅競爭，網絡化同無紙化嘅程度必定日漸提高。
卓妮