政情：民建聯派罩 市民唔滿意質素
武漢肺炎來勢洶洶，市民人人自危，但口罩供應持續短缺，一罩難求。日前一度否認會派口罩嘅民建聯，尋日就突然喺全港多處免費派發口罩，但就被市民質疑口罩嘅質量以至來歷。
張國鈞：醫生話合標準
該黨近日獲香港義工聯盟捐贈五萬個口罩，尋日喺全港七個地點派發。有市民質疑口罩嘅防疫能力，覺得口罩質地比較薄，擔心未能有效過濾飛沫同病毒，仲批評口罩唔係獨立包裝，質疑包裝過程係咪衞生，擔心口罩喺疫區生產，甚至擔心係未經蒸氣消毒過嘅二手口罩，所以收到都唔敢用。
該黨議員張國鈞就話，醫生指佢哋派發嘅口罩符合防疫要求，仲話點做都會有反對者批評喎。至於點解該黨早前會否認派口罩？該黨中人透露，因為當時仲未知道會有口罩可以派，所以被改圖惡搞都要先作澄清，以免啲老人家被騙喺天寒地凍下苦等輪候。另外，捐贈口罩畀該黨嘅香港義工聯盟，尋日亦有派口罩，但就被質疑收集過多個人資料，更有人轉介咗畀私隱專員跟進添。