政情：工聯會求籤都要出貓？
工聯會港島花車團拜尋日喺小西灣舉行，該會會長吳秋北同一班會員向市民送上新年祝賀。期間大會設有求籤環節，但就自製蠱惑籤筒，事關籤筒入面支支都係上上籤，而籤文內容都係啲民生訴求。不過，政府做事後知後覺，甚至冇知覺，做事又慢幾拍，想籤文成真都難嘞！
自製籤筒 民生訴求支支上上籤
活動一開始，吳秋北就提到大家現時應團結一致抗疫，身體健康最重要。然後隨即舉行求籤環節，現場有兩個籤筒，但原來兩籤筒內合共嘅十幾支籤，全部都係上上籤。
而籤文大致都係啲民生訴求，包括「增設每年不少於二千元的長者牙科券」、「增設租住物業免稅額」等，但依家政府做咩都後知後覺，修例風波未平息，疫情又處理得唔好，更唔好講處理啲民生問題喇，所以就算支支都係上上籤，唔通市民真係可以執到支好籤咩，工聯會真係連自己都呃埋。