政情：徐英偉新春遊中山 返港自我隔離
農曆新年唔少港人都會去內地探親或旅行，但因為爆發疫情，港人都少咗外出。不過勞工及福利局副局長徐英偉（Caspar）似乎就冇有怕，農曆新年仲同家人去中山旅行。不過由於政府日前已呼籲所有從內地返港嘅居民如條件許可就盡量留喺屋企自我隔離十四日，所以佢都要自我隔離喇。
稱並非放假 在家繼續工作
Caspar話同屋企人喺新春期間去中山玩咗幾日，全程都有戴口罩，返港後就直接返屋企自我隔離，每日都有量度體溫，未有感染迹象，下周一（10日）就會完成隔離程序。問到點解仲要返內地，佢就話一早計劃咗，出發時疫情都未咁嚴重，又提到中山防疫要求好高，所有人出入公眾場所都一定要戴口罩，否則可能被罰。
為咗令大家放心，佢尋日就喺社交媒體上載自己戴住口罩在家工作嘅相，又稱相入面見到可樂就代表佢返緊工，強調自己並非放假，電郵同電話都無停過。佢仲呼籲從內地返港嘅居民都自行隔離，又希望僱主可以體諒員工，為員工制訂彈性工作安排同提供口罩等防護裝備。