中環出更：疫災歎日本菜 漢奸黎戴口罩招搖過市
武漢肺炎襲港，人人自危，市民都減少外出，不過被內地官媒炮轟為「叛國禍港四人幫」之首、有「漢奸黎」之稱嘅壹傳媒黎智英，竟然仲戴住個口罩周圍招搖過市，尋晚佢就同屋企人去咗尖沙咀廣東道一間日式餐廳食飯。咁嘅時勢仲出街，莫非佢唔怕中招感染病毒？
去尖沙咀 40分鐘極速食完
近日武漢肺炎疫情在港肆虐，唔少市民都因為憂慮疫情擴散或被傳染而避免外出，不過經常唯恐天下不亂嘅漢奸黎就繼續肆無忌憚周圍去。尋晚約六時十分，戴住頸巾、着上運動褲襯外套、戴住個口罩嘅漢奸黎就同家人一齊乘搭由司機駕駛嘅私家車，離開位於何文田嘅寓所。約二十分鐘，載住漢奸黎一家人嘅私家車就開到尖沙咀廣東道一間日式餐廳門前，佢哋落車後就步入餐廳，估計係大歎日本菜喇。
不過漢奸黎呢餐都算極速，佢哋喺餐廳逗留咗約四十分鐘，至大約七時十分就離開，然後一家人搭番私家車返屋企，約七時三十分已返抵寓所。過去一個多星期本港出現多宗武漢肺炎確診個案，市民個個都憂心忡忡，漢奸黎仲有心情歎日本菜，唔通真係本港愈亂，佢就愈開心？
卓妮