中環出更：肺炎肆虐 顏明秀旅行都記緊防疫
近排武漢肺炎肆虐全球，多個國家同地區都出現確診個案，搞到人心惶惶，本港更出現市民搶購口罩情況。早前卓妮喺中環遇到香港中華廠商聯合會青年委員會永遠名譽主席顏明秀（Candy）買外賣返屋企，講起武漢肺炎疫情，佢都話新年旅行搭飛機同埋去到人多嘅地方都會戴番個口罩，盡量小心啲咁話。
Candy早前於傍晚現身中環國際金融中心商場，見佢一個人行商場，之後就去咗港鐵站一間舖頭買外賣。卓妮同佢打聲招呼，佢就話自己啱啱收工，買外賣返屋企食，因為要同屋企人去旅行，所以就留喺公司搞埋啲手尾，加上行李都未執，只好求其食啲嘢就算喇。問到疫情愈來愈嚴重，會唔會擔心，佢就話應該冇問題，因為外國較空曠，不過喺飛機同人多嘅地方都會戴番個口罩，盡量小心啲喇。最近掀起搶購口罩潮，佢就話好彩前排買咗啲喺屋企，暫時都夠用，仲話希望唔好嘅嘢快啲過去就好喇。
黃家和：搭車一定戴番口罩
轉頭又見到香港餐飲聯業協會會長黃家和一個人喺度行街，佢本來打算坐的士，但係見人龍太長就轉為搭地鐵。佢去到港鐵站後就喺衫袋攞個口罩出嚟戴。佢話其實平時商場多人都會戴口罩，但今日少人，所以就冇戴，但搭港鐵同公共車輛就一定要帶番喇。佢又話已經訂咗成萬個口罩，因為公司又要用，有時亦要畀埋客人，所以就算價錢貴咗都冇辦法。
財經事務及庫務局前局長陳家強日前都同太太行街，佢哋由中環碼頭行入商場後，就去商場服務台用消毒酒精搓手。原來佢哋去完愉景灣打波，準備返屋企，兩人都戴實口罩。陳話屋企一向都有買定口罩，慳慳地暫時都夠用喎。
卓妮