政情：公民講場：噏得就噏 蔣麗芸話口罩蒸得 鍾國斌又傳可重用

到底口罩可唔可以重用，近日都成為城中熱話。立法會衞生事務委員會主席蔣麗芸（Ann）日前一番清蒸口罩消毒重用言論惹來外界強烈質疑，而紡織及製衣界議員鍾國斌（Felix）尋日就話業界與香港理工大學研發一款新嘅布口罩，可清洗及重用五十至七十次，仲話取得國際認證，預料最快十多日後就可推出市場供應。不過理大之後就澄清，話大學係受香港紡織及成衣研發中心委託研發防菌物料口罩，主要防止細菌同霉菌，暫時未有數據驗證物料可有效防病毒，而相關物料嘅產品開發只用於家居產品，並無涉及防病毒類型嘅口罩。仲以為有好消息，大家唔使再撲口罩，似乎又係空歡喜一場喇。睇嚟Felix同Ann都係五十步笑百步咋喎。