政情：八網難逃：秘密任務 周炫瑋自製搓手液
大埔區議員周炫瑋喺社交平台上載照片，見佢戴晒口罩同手套，面前有一個個容器，仲手持針筒添。佢就留言話，自己正進行緊「秘密任務」，又話「有啲攻鼻」同「聞足幾個鐘有啲high」。唔少網民見到都有留言，仲笑佢小心會被指製作生化武器同燃油彈。究竟佢搞邊科呢？
被指似整生化武器
周之後都揭曉，原來佢同胡耀昌、連桷璋、姚躍生、文念志等多名當區議員就同埋一班義工一齊買材料製作消毒搓手液，打算喺下周二（4日）舉行「和你派消毒搓手液」，但每名領取者只限取五十毫升，必須自備容器，而且亦都要收取五元o架。
周就解釋，由於坊間原材料供應短缺，今次製作數量有限，未必能夠照顧到每一個人，收番五元都只係想之後製作更多潔手液派畀大家，希望大家可以體諒佢哋區議員面對嘅難題喎。佢亦都鼓勵市民，要共同做好抗疫工作，一齊應對肺炎疫情。