政情：區選敗將懶理疫症搞聚餐
農曆新年但撞正武漢肺炎肆虐，唔少人都取消聚會，以免散播病菌，但日前曾任離島區議員嘅傅曉琳（Sammi）就喺社交網站上載一班朋友聚餐嘅照片，大家都笑容滿面好開心。問番Sammi，原來佢哋去咗前荃灣區議員林琳屋企拜年。
去聚餐嘅包括荃灣區議會前主席黃偉傑、前東區區議員植潔鈴、葵青區議員郭芙蓉（Jody）同梁嘉銘等。Sammi話其實平時大家得閒都有聚會，新年梗係都要一齊玩，開心吓喇，加上林琳屋企夠大，啱晒成班人打麻將、唱K同打邊爐。
做足預防措施
但武漢肺炎咁猖狂，林琳真係唔驚？佢就話因為屋企車房隔籬有洗手間，每個人都要洗手清潔好先可以入門口，而且佢哋嚟之前都戴晒口罩，應該冇事，唔太擔心喎。佢又自嘲話呢個係失敗者嘅聚會，因為得Jody同梁嘉銘喺去年區議會選舉勝出，其他幾人都係落選，不過佢哋依然玩得咁開心咁話。