政情：試搭澳門輕軌 顏汶羽暗寸港府廢
澳門輕軌列車通車一排，都吸引到唔少遊客專程去乘搭，觀塘區議員顏汶羽（Frankie）早前去澳門亦都順便試搭。佢話第一個感覺就係站內設計超似香港港鐵南港島線，都係自動行駛列車。佢又話，如果澳門輕軌可以盡快接駁半島，就會更加方便喎。
Frankie話澳門輕軌列車特別在於車頭、車尾同車門都有好大塊玻璃比乘客觀光。佢搭當日好多乘客都湧晒去車頭同車尾睇風景。佢唔夠啲人爭，就惟有企喺車中間算喇。雖然佢都覺得整體感覺幾舒適，但車速就偏快，佢同太太喺轉彎嗰陣都有少少飄移感覺。佢又希望可以盡快接駁埋澳門半島，唔使再等十幾廿年喇。
九龍東單軌列車落實無期
佢咁講，似係寸港府多啲，事關九龍東單軌列車都係講咗十幾年都未落實。佢仲批評政府諮詢研究搞一大輪，依家就冇咗影，都唔知仲起唔起喎，又話依家觀塘區塞車嚴重，啟德區發展後將帶嚟多幾十萬人口，單軌列車係可打通啟德、九龍灣同觀塘商貿區嘅重要交通基建。之不過，都要政府肯去做先得嘅。