政情：素肉贈王力宏 楊大偉晒合照招妒
推廣素食嘅社企Green Monday創辦人楊大偉（David）日前喺社交網站上載咗同藝人王力宏（Leehom）嘅合照，照片中David送咗袋豬肉畀Leehom。不過Leehom係全素主義者，點會食豬肉呀？唔通佢為咗練大隻啲，所以要食番肉？而呢張合照仲惹嚟唔少Leehom嘅「粉絲」妒忌添。David就解釋嗰袋豬肉其實係純素豬肉，而Leehom就讚純素豬肉好食之餘，仲可以救番好多豬仔嘅生命，建議大家可以試吓。
食齋亦可練到好大隻
其實近年港人熱衷健身，為增肌通常每餐都會食肉，但其實食齋都可以練到好大隻，Leehom就係身材健碩嘅素食代表。佢今年仲轉為全素主義者，連奶製品、雞蛋等產自動物嘅嘢都唔食。佢之前就喺社交媒體推薦大家睇一段紀錄片，段片嘅內容顛覆咗一定要食肉先身強體壯嘅傳統觀念，當中仲有唔少素食可以預防疾病嘅研究片段。
而David就多謝Leehom向粉絲宣揚素食主義，話大家每周一餐食素，就可以為地球帶來大改變喎。