中環出更：財經會開會改期 主席籲反對派咪拉布
因應武漢肺炎疫情愈來愈嚴重，立法會多個委員會會議都要另定日期舉行，其中財經事務委員會主席張華峰（肥老闆）話，取消咗原定下周一會議，遲啲可能就要由早上八時半開會，開到晚上八時結束，中間再安排議員食飯時間。不過最重要係議員要先夾好檔期，先可以安排加開會議。佢仲叫反對派唔好再拉布浪費時間，要以社會同市民利益為先喎。不過幾個委員會會議都改期，到時夠唔夠會議室都係問題。
復會日期要視乎疫情
佢又話，財經事務委員會下周一議程包括金融管理局交代目前同未來經濟表現同投資回報，證監會亦會派員出席講解本年度開支預算，而破產管理署就會申請一筆四千多萬元嘅撥款用作建立電子平台，依家都要遲啲先可以開會傾喇，而副主席梁繼昌都同意。至於確實復會日期，佢就話都要視乎政府推出乜嘢類型嘅措施去應對目前疫情而定喎。
唔止財經事務委員會，保安事務委員會同埋有關都市固體廢物收費修訂嘅法案委員會下周二嘅會議都會改期，而同日原本仲有交通事務委員會轄下一個小組嘅實地視察活動，依家都取消埋喇。
卓妮