中環出更：新年難免食多咗 陳黎惠蓮飲涼茶消滯
新年通常大家都會一家人聚埋一齊食飯，又或者外出向親友拜年，少不免會食多咗。食得太飽，又滯又肥點算好呢？保良局副主席陳黎惠蓮（Winnie）就話，佢新年同屋企人去旅行，都食咗好多肥膩嘢，而佢就會飲涼茶嚟消滯喎。
Winnie啱啱同屋企人去完馬來西亞馬六甲玩，連埋啲孫同工人，總共有二十四人，咁多人惟有自己包團玩喇。去到東南亞玩，多數都係食辣嘢，Winnie就話好鍾意買當地一種涼茶嚟飲，涼茶係獨立包裝嘅茶包，一個茶包可以沖四杯茶，飲完之後唔單止消除油膩感，仲好清熱氣添。佢又話，自己都有自製新年糕點嘅習慣，啲孫都好鍾意食，佢仲會同讀中學嘅大孫女一齊整，孫女學校有家政堂，而且都好鍾意煮嘢食咁話。
施榮懷同爸爸喺屋企寫書法
香港中華廠商聯合會永遠名譽會長施榮懷同爸爸施子清一齊現身，佢哋過往新年都有全家一齊去旅行嘅習慣，不過施榮懷就話爸爸今年唔想周圍走，想花多啲時間喺香港過年，所以就冇去到旅行，留喺屋企寫揮春同書法。而佢哋四兄弟就淨係近近哋去咗澳門，留番多啲時間嚟陪老人家喇。
顏寶鈴自細學整福建炸肉丸
香港中華總商會常務會董顏寶鈴係福建人。而福建人過年係特別多傳統習俗。顏寶鈴就話，自己唔單止會自製新年糕點，仲會整福建炸肉丸，因為佢係大女，所以細細個已經要跟媽媽學整炸肉丸。食得多點都會有啲滯，佢哋就習慣配茶，一路飲茶，一路食，咁就唔怕肥膩喇。
既然有門手藝，就梗係要傳承落去啦，不過佢就話唔急住教班仔女，始終佢哋仲細，等到佢哋成家立室先再教喎。
卓妮