政情：民政局萬能職位 議員質疑顧唔掂

兼顧體育園及推行政策

話說有關職位仲要檢討香港體育設施供應情況、推行政府嘅體育政策，就連私人體育會都關佢哋事。唔少議員都關注私人體育會嘅問題，其中Holden同另一議員陳志全都關注啲監管措施，而Holden仲提到啲職能問題，覺得啲工作都好重要，擔心分工問題添！雖則係咁，但班議員都冇留難班官，嗱嗱聲以不記名方式通過議案。

另外，委員會仲討論將運輸及房屋局一個首席助理秘書長職位轉為常額職位，呢個職位係處理香港海運業發展，但情況就冇咁好彩喇，事關議員胡志偉提到話幾個助理秘書長嘅工作內容分別唔大，質疑轉常額後啲職能有重疊，仲建議將現有職位嘅工作分配畀兩個常額職位做。

運房局副秘書長李頌恩解釋，相關職位主要係處理海運業，包括海事處內部管理、本地船舶規管、人事培訓等，其他職位則負責物流業支援、海事處的整體管理同海上的安全。