中環出更：藍國慶細仔百日宴 笑言冇幫手湊過
屋企添加新成員絕對係一件喜慶事，事隔多年再添丁就更開心喇！善德基金會常務副主席藍國慶嘅囝囝藍偉天早前舉行百日宴，唔知佢對囝囝有乜嘢期望呢？
藍國慶將囝囝改名做偉天，係希望囝囝將來成為一個頂天立地嘅人。偉天英文名叫Lyndon，取自一個美國已故總統。藍國慶話雖然世人對呢位Lyndon總統評價不一，但Lyndon總統任內致力推動維護民權同扶貧政策，幫助好多人脫貧，藍國慶希望囝囝長大後都可以令世界美好一點點。
佢本身育有三名仔女，依家都已經廿幾歲嘞！咁當年同依家湊仔有冇分別？佢講笑話冇分別，因為佢都無幫手湊嘅，但唔代表佢唔錫囝囝嘅，佢話同太太王雲仙（Mina）之前打算去泰國四面佛還神，但就要擺低囝囝係屋企，Mina就話去兩日一夜喇，而佢直頭提議不如即日來回，可見幾咁緊張囝囝。
吳清煥喺屋企擔任「好人」
講起教仔經，香港中華廠商會副會長吳清煥話自己唔係「虎爸」，完全無逼過仔女溫習或者參加興趣班。相比起啲仔女幼稚園都未返就要學幾種外語同上面試班嘅父母，吳清煥就話亂咁幫仔女揀學校，只要就近就得，去到仔女讀高小，太太先發覺唔對路，開始嚴格督促仔女學業，仔女最後都成功入晒名校。吳清煥講笑話佢喺屋企擔當好人角色，所以一直以嚟同仔女關係都好好，仔女有咩嘢都會話佢知。
廠商會另一副會長徐晉暉都唔會逼囝囝一定要做啲乜嘢或者學啲乜嘢，佢比較重視親子相處嘅時間。好好彩佢同囝囝有共同興趣─網球，兩仔爺成日一齊打波。佢仲應承咗囝囝如果打贏自己，就送一對波鞋畀佢。點知囝囝真係贏咗佢一局，佢就話記住帳先，到依家囝囝已經贏咗四分一對波鞋喇！
卓妮