中環出更：何君堯返鄉運桔 網民祝掃走毒氣
喺過去逾七個月，香港社會動盪，人心不穩。臨近農曆新年，立法會議員何君堯尋日喺Facebook（Fb）上載咗段短片，原來佢返咗家鄉惠州博羅摘桔，仲話運返嚟添！
何君堯喺短片中介紹嗰度方圓六十畝地，總共種咗四千株桔，今年更加係大豐收，株株都長滿桔，佢話暫時只係摘咗七桶，咪眼見以為好多，如果拎晒返香港，每家每戶送啲都唔夠分呀！佢仲向市民拜過早年，祝大家大吉大利，滿門吉慶！
呢個Post出街後，好多網友留言回祝大吉大利，亦有個別網友批評佢係「香港流氓，香港黑社會.......」，亦有網民留言「何議員，記得帶多啲吉氣回香港！大吉大利！掃走黃氣、毒氣！大家加油，Yeah！」
盧偉國整潮汕凍魚團年
「盧家私房菜」亦出動，工程界議員盧偉國喺Fb貼文，話日前逛大埔街市去到相熟嘅魚檔，買定條三斤幾重嘅「大馬友」，準備團年食潮汕式凍魚。佢叫檔主劏好，唔使打鱗，用海水沖淨，返屋企就咁放入冰箱，可以保鮮好耐，就喺年三十晚早上解凍，加啲鹽醃吓，然後連鱗蒸熟，再放涼，晚上團年以「普寧豆醬」佐之，就有味「年年有餘」嘅意頭好餸啦！跟住佢又介紹一味新年意頭餸「嘻哈大笑」，當晚整味「乾燒明蝦」喎。
林煥光留港陪太座賀歲
此外，卓妮早幾日遇到行政會議前召集人林煥光同太太十指緊扣喺置地廣場行街，佢哋經過店舖櫥窗不時停低觀看，有傾有講恩愛非常。當佢哋去到中環港鐵站時，記者上前同林打招呼，問到新年有冇打算去外遊，佢話大節日出到外地反而仲多人過香港，今年會留港消費振興吓。佢又話全面離開政府工作後盡量放鬆自己，嗰陣時做嘢冇乜時間陪太太，依家多啲時間同太太行街食吓飯，久唔久行山運動吓咁。
卓妮