政情：八網難逃：黃錦星玩網上直播 大嘥鬼太搶鏡被逐
社會立立亂，政府民望低迷，一眾高官就排住隊玩網上直播，聲稱要同市民加強溝通。環境局局長黃錦星尋日下午就同環境局局長政治助理區詠芷（Michelle）一齊喺社交平台直播「同你傾環保」，同網民講吓環保議題。期間環境局嘅宣傳代表「大嘥鬼」就突然亂入搶鏡，搞到Michelle都忍唔住要趕佢走添。
企喺後面行嚟行去
繼商務及經濟發展局局長邱騰華同埋勞工及福利局局長羅致光玩完直播後，尋日就到黃錦星喇。本來個直播一直都算順利，黃都不斷回應網民提問，點知去到直播嘅尾聲，黃每次出席活動時都幾乎會出現嘅「大嘥鬼」就突然拎住個飯盒現身。本來黃同Michelle見到「大嘥鬼」都好親切咁叫佢做「阿鬼」，但點知「大嘥鬼」一直喺佢哋後面行嚟行去。最後Michelle就忍唔住下「逐客令」，叫「大嘥鬼」去叮埋個飯同寫埋份文件先喇。認真搞笑。