泛民主派喺區議會選舉取得三百八十五席，穩袋今年立法會換屆選舉傳統功能界別區議會（第一）議席。早前有政治素人就提出由本身為油尖旺區議員嘅民主黨（白鴿黨）立法會議員涂謹申（阿涂）出選區議會（第一）議席，但本身為俗稱「超級議員」嘅區議會（第二）功能界別嘅阿涂就無意轉跑道。有白鴿黨中人就話，該黨九龍城區議員黃國桐或者係參選區議會（第一）較合適人選。如果真係咁，會唔會被人鬧佢哋太大貪呢？
黃國桐曾任多區區議員，上屆區議會選舉落敗後，去年底區選就打着白鴿黨旗號參選九龍城太子選區，並成功重返議會。有白鴿黨中人認為，黃同阿涂一樣都係資深區議員，而且喺二○一四年佔領行動，以及其後嘅旺角暴亂同埋近期嘅反修例示威中一直為被捕示威者提供法律援助，唔止泛民接受，相信亦係本土派較易接受嘅人選。雖然黃已七十歲，不過keep得唔錯，年齡應該唔係問題咁話。
但呢啲諗法可能係白鴿黨中人一廂情願，事關素人建議阿涂參選區議會（第一）議席係擔心阿涂未必能夠穩勝超級議席，加上佢為現時最資深立法會議員，認為保留議席對民主派有利。惟阿涂已報名參加黨內超級議席甄選，如該黨再推舉另一人選參選，相信必起爭議。