政情：古物塗鴉籲珍重 岑智明啼笑皆非
塗鴉可以係一種藝術，亦可以係一種破壞，但天文台台長岑智明早前見到一種塗鴉，竟然令佢啼笑皆非，究竟搞邊科？
話說天文台經常都會講氣象冷知識畀市民知，早前就推出一連四集「尋找魔法石」短片，其中一集就係講香港子午線，引起大家興趣。岑智明日前就做導賞員帶政府同事去寶雲道考察，皆因嗰度有南子午線標記。不過佢去到時就發現標記上寫咗兩行字︰「百年子午線石，大家珍重！」，叫人珍惜百年古物，岑就話，真係令人啼笑皆非喇。
好彩用粉筆寫 抹得甩
又難怪岑智明咁講，皆因呢兩行字變相破壞古物，真係好諷刺，唯一好彩嘅係啲字係用粉筆寫，所以對石柱破壞唔深。佢又話，好彩得到古物古蹟辦事處同事幫忙，快速將塗鴉清除，佢仲懇請大家真係要珍惜歷史文物，高抬貴手，唔好再破壞佢哋喇。正如佢話齋，好彩呢兩行字係用粉筆寫，都仲抹得甩，若果用其他顏料嘅話，就真係水洗都唔清喇。