政情：兩日兩度斷正 周偉雄被建議改名「周違泊」
有區議員兩日兩度被揭發違例泊車，前日（16日）第一次被揭發違泊後強調無下次，點知尋日又嚟料，講緊嘅係葵青區議會葵盛東邨區議員周偉雄。事緣有讀者報料，話尋日喺旺角西洋菜街發現周偉雄涉嫌違泊，明明前日先被本報另一位讀者指佢喺葵青區違泊，當時周偉雄實牙實齒話下次唔會（違泊），所以讀者鬧爆周無誠信，違泊最少十五分鐘，提議佢不如改名做「周違泊」喎。
賴都市規劃差
周偉雄接受查詢時再次承認違泊，但就死撐唔係長期停泊、無搞到塞車同無被警察抄牌，佢話當時搵唔到位，於是就將架車泊喺馬路邊，落車買嘢期間一直有留意路面情況，仲話架車喺視線範圍內五十米。眾所周知，違泊即係違例，但周竟然賴政府都市規劃做得唔好先會有違泊同道路擠塞嘅情況出現，好似個別新落成嘅公共屋邨車位不足，搞到唔少居民嘅「搵食車」都無位泊。
周亦將矛頭直指從事汽車維修、五金買賣等行業，批評佢哋經常有雜物長期霸佔咪錶位，令到真正有需要泊位嘅車主無辦法泊好架車，被迫冒險違泊。無論點都好，無車位並非違泊嘅藉口，而市民對區議員嘅要求亦更加高，仲畀市民批評無誠信，不過今次周就再無講下次唔會喇。