中環出更：邵家臻遭浸大停教職 面臨紀律聆訊
因違法佔領行動（佔中）案被判入獄八個月嘅社會福利界立法會議員邵家臻（阿臻）尋日收到香港浸會大學通知，話要暫停佢嘅教學工作，雖然其講師身份仍然喺度，但大學已經就其去年四月因佔中案被判有罪一事成立咗內部調查委員會，將會進行紀律聆訊。阿臻就話事出突然，仲質疑大學咁做係「政治打壓」，又話法院下個月將會處理佢嘅上訴，認為大學喺未有上訴結果嘅時候就急於召開聆訊，係有違程序公義o架喎。
阿臻就話，上周四已發現其下學期嘅教學工作被抽起，於是就同系主任了解，但對方就話唔知情，至尋日下午三時，佢就收到相關信件。
本來佢要求帶同律師同工會代表嚟應訊，但大學方面就話過往冇類似做法，亦冇向其交代聆訊嘅日期咁話喎。
冇立會選舉資格 隨時變雙失
阿臻由二○○七年起正式成為浸大全職講師。佢話自己工作表現一直相當理想，亦得到系主任、學生肯定，認為今次被暫停教學職務明顯唔係佢個人工作問題，而係「政治清洗、打壓」，質疑係咪「一日唔將邵家臻趕盡殺絕，一日都唔收手」。邵已經喪失參選今年立法會選舉資格，如果冇埋個教席，就變雙失喇。
卓妮