中環出更：舞夜光龍奪金 郭文龍呻冇場地要天橋底練
「世界香港夜光龍醒獅錦標賽」早前喺紅磡體育館上演，香港代表隊相隔十三年，再次喺夜光龍項目中奪金。所謂台上一分鐘，台下十年功，要拎到咁好成績，箇中辛酸同挑戰真係不足為外人道。身兼冠軍隊伍總教練嘅旺角街坊會副主席郭文龍就話，因為本港缺乏場地畀隊員練習，一眾隊員甚至要喺天橋底練習，真係唔容易。
郭文龍話，要喺本港搵到適合嘅場地練習舞龍、舞獅好困難，因為需要面積大嘅場地，練習舞獅更需架設樁柱，本港運動場館不止難預約，而且好多時都擔心佢哋嘅練習器具會對場地造成損壞，唔租場畀佢哋，所以即使係拎過冠軍嘅龍獅隊都試過喺工廈天台、停車場，甚至喺天橋底練習。
陳香蓮：年輕先舞得出力量
香港代表隊總領隊、旺角街坊會主席陳香蓮就話，政府早年都曾經喺旺角安排咗兩個地點畀佢哋練習，不過就快會被收番。佢又話，雖然自己冇試過舞龍、舞獅，但就認為舞龍、舞獅係力嘅表現，要舞得出神入化，真係要年輕先得，希望年輕人多啲學習國粹，認識中國文化咁話。
江沛偉：觀察貓舉動悟神韻
同場仲見到博愛醫院前主席何榮添、副主席簡陳擷霞同香港國術龍獅總會會長江沛偉。江就話，舞獅要舞得有神韻，有唔少學習舞獅嘅人都會去觀察貓嘅舉動，而佢自己更加養過貓添。講到興起，江又即席示範咗點樣表現出「驚」嘅感覺，真係維肖維妙。佢仲話，喺比賽入面，即使係外行人都可以一眼睇得出邊隻係「獅王」，因為嗰一隊一定係舞得好活潑、好有力量喎。
卓妮