政情：區會傾違泊 周偉雄親身示範
葵青區議會尋日喺葵興政府合署召開第一次特別會議，其中一項議程係討論區內違泊問題。不過，有讀者就發現葵盛東邨選區區議員周偉雄自打嘴巴，喺開會期間將自己架私家車停泊咗喺政府合署附近嘅一段興芳路，而嗰個位置並唔係一個合法泊車嘅地點。
周偉雄接受我哋查詢時直認違泊，指自己都唔好意思，仲話下次唔會喇喎。佢解釋，其實自己都唔想違例泊車嘅，只係早上喺屋邨有要事，自己遲咗大約十五分鐘先去到開會，而政府合署附近並無其他合法嘅泊車場所，為咗唔想遲到得更加厲害，所以就將架車泊咗喺葵涌中心對開嗰個唔能夠泊車嘅位置。
預咗收「牛肉乾」
被問到有冇畀警方抄「牛肉乾」？周偉雄就話冇被抄牌，亦提到自己本身都預咗會畀人抄牌，即使被抄牌都唔會埋怨。佢又提到若果政府合署可以有車位安排畀區議員用就更加理想。
不過，佢亦都提到葵青區一直面對車位不足嘅問題，加上依家警方執法密度低咗好多，令到區內違法問題嚴重咗好多咁話喎。睇嚟周偉雄想解決區內違泊問題，首先要做個守法者。