政情：機電署男廁特別臭？薛永恒認尿味重

機電工程署男廁特別臭？！機電署尋日舉行傳媒茶敍，署長薛永恒帶傳媒遊覽位於九龍灣嘅機電工程署總部大樓，經過一啲廁所時，門口竟然裝有電子顯示屏，一問之下先知原來係用嚟監察廁所入面嘅數據。其中喺一個男廁門口，電子牌「NH3（氨、阿摩尼亞）」嗰欄變咗紅色，薛就笑住解釋：「應該係尿味重。」

機電署廁所個監察系統，唔單止可偵測廁所個阿摩尼亞氣體含量，仲可以睇到入面嘅溫度、濕度，同其他化學物含量資料，包括甲醛（HCHO）同硫化氫（H2S）等，好高科技。「阿摩尼亞男廁」之外，另一個男廁都顯示硫化氫比較多，反而女廁數據就好正常，唔知係咪因為機電署男職員多，男廁特別臭呢？

講開衞生議題，薛永恒就話自己聲沙，有幾聲咳，但再三強調自己冇去過武漢，亦冇去過街市，叫大家唔好擔心佢有武漢肺炎咁話。