政情：越南影靚相 林琳自嘲「豬」光寶氣
過咗聖誕大半個月，啲燈飾早就拆晒喇！但青年發展委員會成員林琳話仲感受到聖誕氣氛喎。點解？原來佢同老公近日坐郵輪去咗越南胡志明市，話當地仲有聖誕feel，但佢就熱到中暑，見完二十年冇見嘅中學同學就返船抖啦！
網友大讚「高高瘦瘦美少女」
林琳喺Facebook上載咗幾張相，其中大張相係喺教堂前留影，有網友大讚佢係「高高瘦瘦美少女」，而佢就話呢個反映角度嘅重要性，另有網友幫口話「乜嘢係肥，係珠光寶氣呀！」佢直情好老實咁話唔係「珠」，係「豬」先啱。
千里外相會，佢話呢個同學去咗越南十五年，喺度讀多個學士學位。佢仲話同學好興奮講咗三次話真係好奇妙，二十年冇見，唔喺香港，唔喺韓國又唔喺澳洲見，竟然可以喺越南重遇，希望佢下次可以同老公一齊去，仲問佢做乜個老公愈嚟愈肥喎。
乜嘢咁奇妙？原來呢位係佢喺澳洲讀中學時嘅同學，係韓國人嚟，大家明晒喇！