政情：陳智遠鬧爆政府 兩個樂園蝕到暈 市民血汗錢填氹
海洋公園近年面對嚴峻嘅財政狀況，預料之後虧損仲會擴大，商務及經濟發展局局長邱騰華日前建議向公園一次過注資高達逾一百億元，支持公園發展同翻新。食物及衞生局前政治助理、依家轉做文化深度遊嘅陳智遠話兩個樂園年年蝕錢，炮轟政府仲要攞納稅人嘅血汗錢掟落無底洞。
陳智遠離開「熱廚房」後，曾喺Facebook（Fb） 爆seed 力數高官虛偽，之後亦經常月旦政事，由於依家係旅遊業界嘅一分子，對於政府近期推出紓緩業界嘅措施，亦都毫不留情地批評，仲話靠政府，業界不如自救。
百億注資 投入如無底洞
喺政府日前建議注資畀海洋公園後，陳智遠亦喺Fb貼文，話公園方面拎咗一百零六億元，其中三十億元應該係用嚟還債同填財政赤字。佢又話海洋公園同香港迪士尼樂園，明明喺過去十年嘅業績表現已證明，要香港遊客爆煲、樂園爆到企唔到先做到收支平衡，本身營運模式肯定有問題喇，但依家竟然愈蝕愈掟錢落去，究竟係乜嘢邏輯？
佢話係咁問納稅人拎錢，投資落一個風險未明、而且證明唔到未來旅客人數、唔會再賺到錢嘅樂園擴建項目？加上公園起得愈大，經營成本只會愈高，好似管理設施、聘請員工、維修等，好難做到收支平衡，愈擴建咪即係將個財政洞穴愈挖愈深咁話喎。
一味求大 籲議員再慎重
講到樂園設施，佢話近年亞洲好多城市都搞樂園，香港開始落後就覺得一定要追，起大啲、起多幾個主題區，呢種「策略思維」其實好懶，佢又質疑樂園擴建嗰啲項目有幾新？可能幾年後就玩厭，無人嚟，到時樂園又陷入財赤，又要政府注資，咁嘅情況只會不斷輪迴。
最後，佢仲話作為一個納稅人，佢間公司亦好艱苦經營，又要交利得稅，無理由畀政府咁樣用啲血汗錢喎，仲叫班立法會議員認真諗諗，咁嘅撥款係咪真係應該支持？
老實講，政府要救樂園，但係冇旅客點會有生意，相信班議員都知道條數點計嘅，睇嚟邱騰華都要花多啲力水去游說吓班議員嘞！