中環出更：防患未然 鄭錦嬋：唔想帶住病長命
香港人生活緊張，又食無定時，但人均壽命竟然位居全球最長壽地區，唔通因為醫療科技發達？身為香港健康產業年度大獎創辦人嘅鄭錦嬋話，好多人都係有病先睇醫生，但醫生可能淨係見你幾分鐘，佢覺得每個人都應要照顧好自己嘅身體，正所謂防患於未然呀嘛。
鄭錦嬋話好細個嘅時候嫲嫲中風，所以深深明白到屋企只要有一個人身體出事都會亂晒龍。佢係屋企細女，七歲已做人姨姨，佢亦知道要照顧自己。佢由中學開始做好多運動，又劍擊又壘球，但運動之外，營養都好緊要，而好多人思想負面有機會同營養不良有關。佢又話雖然香港人好長壽，但無人想帶住病嚟長命(口架)嘛！
廖潔珊研魔鏡分析長輩情緒
香港健康產業年度大獎嘅評審，本身係整形外科醫生嘅彭志宏都認同保持健康嘅秘訣係預防疾病。佢育有一子兩女，細女舊年出世。仲會教大嗰兩個仔女打羽毛球，但打打下波就發現自己有腳痛。佢深感需要減磅，開始控制食量，最後用半年時間瘦咗十幾磅添！科技健康產業顧問廖潔珊就研究緊一塊魔鏡，魔鏡為老人家而設計，可以幫老人家量血壓同埋提醒佢哋食藥，魔鏡仲可以感應老人家每日嘅表情，從而分析佢哋嘅情緒起伏，仔女知道長輩唔開心，咪可以透過魔鏡打電話畀佢哋關心吓。
彭舜玟：越南街市買果仁最平
香港廣西婦女聯會常務理事彭舜玟都好重視健康，自己平時就食素，同朋友食飯先偶爾食肉。佢話果仁含微量元素，可補素食嘅不足，而喺芸芸果仁中，腰果營養價值高，而越南街市所售賣嘅腰果，價錢較香港平好多，所以佢去到越南就會大手入貨，仲話識買嘅話，就梗係去當地人嘅街市買啦，自己唔識越南話，就靠身體語言搭夠。
卓妮