政情:被質疑持美國國籍 梁美芬食住花生拍片反擊

立法會議員梁美芬(鼠王芬)早前被質疑有美國國籍,有人更發起聯署要求注銷其美國國籍。雖然鼠王芬早前已喺社交平台發長文反擊,澄清佢根本冇美國國籍,但唔知係咪仍然心有戚戚然,定係怕有關方面誤會其心志,佢尋日就喺網上再度出擊,發放咗段短片再度回應事件,片中嘅佢仲一路回應網友提問,一路食花生添!

50秒食晒成罐 網友唔多信

片段中鼠王芬一邊伸手入罐去拎花生,一邊睇住手機中網友嘅問題。佢就話有網友問佢有冇「買金着草」,佢就答︰「我廿幾歲就開始買金o架 喇喎」,之後又有人問佢家屬有冇美國護照,佢就回應︰「總之我一家四口都係中國人啦。」

鼠王芬答完兩條問題之後就話︰「盒花生食晒o架 喇喎」,而片中可見罐花生確係所剩無幾。查實鼠王芬段片只係得嗰五十秒,但啲花生就咁快食晒。究竟係罐花生一早畀人食咗大半,定係鼠王芬拍片NG多到要食晒罐花生先拍完,就得佢自己先知喇!

第一手消息請下載on.cc東網iPhone/iPad/Android/Windows Phone Apps