政情:大埔區會設保安及政制委員會涉違例 DO離場

大埔區議會建議設立「保安及政制事務委員會」,尋日原本就為呢個委員會選正、副主席,不過民政事務總署同民政事務專員(DO)認為呢個委員會部分職權疑違反《區議會條例》,所以建議修改,但班議員就話唔使,決定繼續進行選舉。最後個DO就同埋民政處職員、區議會秘書處職員等齊齊離席。

指職權範圍過闊

呢個新設立嘅委員會共有六個職權範圍,DO認為部分職權可能違反《區議會條例》,包括「檢討及發展區議會職能,並就市政政制提出意見」,以及「監察及研究與大埔區內保安、公安、公眾安全、入境事務有關的政府政策及公眾關注的事項」。DO指出,區議會應該只管理自己區嘅事宜,而大埔區並冇入境口岸,所以委員會職權範圍唔應該包括入境事務。但有議員反駁,指入境處管理範疇好闊,大埔咁多跨境學童,都關入境處事。DO重申,議員可以喺委員會討論入境處政策,但都只屬提供意見,並非負責有關事項。

DO之後都有再提議議員可以再討論,或者等政府研究後,於下一次區議會大會上討論。不過班議員就堅持繼續選舉正、副主席。DO惟有話,因委員會職權可能違反《區議會條例》,佢哋身為公職人員,因職能所限唔可以再為委員會提供服務,最後就一齊離席喇。

第一手消息請下載on.cc東網iPhone/iPad/Android/Windows Phone Apps