政情:慶祝經營油蔴地小輪20周年 新渡輪送月票出手「驚人」

唔講唔覺,新渡輪接手當年油蔴地小輪嘅專營權已經有二十年,每日營辦五條港內及離島渡輪航線接載大批市民出行。為慶祝二十歲生日,新渡輪準備咗一系列活動,唔單止義賣手繪瓷器幫環團惜食堂籌款,仲決定送出免費月票,答謝一直支持佢哋嘅乘客,但名額只得廿三個,出手似乎低咗啲喎。

吸引力有限 反應冷淡

想拎到呢廿三個免費月票名額,必須係喺舊年十二月,以及今年一月同二月買過新渡輪嘅月票,再登入新渡輪嘅手機APP答一條簡單問題,先有機會獲得。金獎係一年免費月票,銀獎係四個月的免費月票,而銅獎係一個月嘅免費月票。

新渡輪會根據參加者答問題嘅次序嚟送出獎品,其中中環至長洲線嘅金獎有三個名額,銀獎四個名額、銅獎則三個名額;中環至梅窩線的金獎名額有三個、銀獎四個、銅獎得一個;來往北角至九龍城或紅磡航線,則設一名金獎、兩名銀獎同兩名銅獎。

唔知道係咪獎品唔太吸引,抑或本身有買月票嘅人太少,聽聞暫時幾條航線加埋都大約只有三百人去爭呢批獎品。不過,如果對比旅發局搞嘅除夕大抽獎,新渡輪呢個送月票活動都算可以接受,起碼唔使等收驗證碼等到發忟憎。

第一手消息請下載on.cc東網iPhone/iPad/Android/Windows Phone Apps