政情：尹兆堅開會影都冇 被寸下回請早
民主黨立法會議員尹兆堅（肥尹）日前去信立法會工務小組委員會主席盧偉國，話要申請逾期加入小組。尋日工務小組開會，首項議程就係審議係咪批准肥尹加入。不過身為主角嘅肥尹就冇影，未有出席會議。違法佔領行動期間，建制派申請逾期加入委員會時曾被民主派玩嘢阻撓。尋日多名建制派議員就「玩」番轉頭，話肥尹應出席會議解釋加入原因，又話議員要準時開會先得，暗寸肥尹唔準時，最後肥尹嘅申請就要押後處理喇。
建制要求解釋加入原因
工務小組處理肥尹申請時，作為小組委員嘅民建聯周浩鼎（Holden）就話，有議員想加入參與審理固然係好事，但就好奇肥尹點解嚟到本屆立法會屆尾先話加入，想聽吓肥尹解釋。議員梁志祥亦都附和黨友Holden，話如果肥尹本人喺度會好啲，最低限度係有乜疑問都可以畀佢回應，但就強調絕對唔反對肥尹加入，仲會掉轉支持，只係覺得肥尹在場討論吓好啲。在場嘅工聯會勞工界議員陸頌雄就冇咁客氣，寸爆肥尹話雖然支持有同事加入，但都要準時開會先得，又話申請加入嘅人都仲未返到立法會，希望對方可以解釋吓，建議下次會議先處理。
見到肥尹被圍攻，民主派議員都幫肥尹護航，其中陳志全就話逾期加入委員會嘅情況以往都處理唔少，要求申請人出席答問嘅情況亦曾試過，過去都有申請者係等大家批准後先正式加入嚟開會，認為如果肥尹知道有人提問，都一定會出席，希望唔好因為人哋冇嚟開會或未出現，就認為人哋唔尊重委員會，或者誠意不足咁話。
冇吸取黨友遭攔路教訓
咁究竟肥尹點解唔出席會議呢？佢就話因為早上有訪問，要去講述政府紓困措施事宜，而且自己未係委員會成員，一般情況都係申請獲批後先需計算出席，佢亦估唔到有建制派議員會質詢佢參與委員會原因，形容同慣例不符喎，依家惟有等下次會議列席答辯喇。其實去年十月，肥尹黨友、議員許智峯（峯鴿）亦都申請逾期加入工務小組，當時峯鴿亦都被建制派攔路，要求佢詳細解釋原因，可謂前車可鑑，肥尹咁都唔醒目嚴陣以待，真係畀人寸都抵。不過說到底，呢啲都係民主派之前自己種下嘅惡果啫。