中環出更：容海恩斥毛孟靜 關心孕婦得把口
立法會大會尋日繼續討論係咪將有關增加產假嘅僱傭條例修訂草案，繞過內務委員會，直接交由人力事務委員會審議嘅動議，即將生第二胎嘅議員容海恩（Eunice）直斥泛民主派唔好口口聲聲話幫婦女，更特別點名批評毛孟靜關心孕婦得個講字。佢仲自爆兩年後可能計劃再生，認為唔應該畀泛民拖垮條例，繼而剝削第時有機會生育嘅婦女享受嘅福利同權利。
自爆兩年後或再生 要爭取福利
Eunice話如果泛民主派議員有心幫婦女或者勞工界，就應該畀條例通過，如果今年處理唔到，下屆就要重新嚟過。佢又話拖延審議條例嘅話，係影響緊未來有意生育嘅婦女權益，而今次修訂條例內容其實唔算多，但佢強調非常重要，包括法定產假延長四星期、延長產假需要畀嘅薪酬設立上限、縮短流產定義入面嘅懷孕期同埋到診證明書等，希望泛民能夠體恤懷孕婦女嘅需要。
另外，工聯會尋日到政府總部請願，促請立法會通過增加產假條例草案嘅動議，將修訂交畀人力事務委員會審議，令在職懷孕婦女盡快得到保障，同時符合國際標準，立法會勞工界議員陸頌雄鬧爆反對派議員「連大肚婆都唔放過」，本屆內會已舉行十二次、近三十小時會議仲未選到正、副主席，批評主持會議嘅泛民議員郭榮鏗濫用規程，拖延會議進度「攬炒」。而為防泛民主派突襲否決動議，建制派認為條例唔能夠再拖延，亦特別留守立法會開會，因而缺席中聯辦嘅新春酒會。
卓妮