政情：違泊冇人執法 鄧威文促警設篤灰熱線

鄧威文形容佢嗰區違泊嘅車龍有成八百至九百米長，有啲車仲大膽到違泊廿四小時，好多街坊向佢反映打999報案熱線無人理，而佢試過深夜去抄牌，抄晒成條街違泊車輛嘅車牌。佢又認為電子報案中心嘅系統太落後，因為每次只可以「report 4個case」，再加上附件得嗰6MB，但有成幾十張相，一次過upload唔晒，於是建議警方可以開一條「篤灰熱線」，畀街坊透過通訊軟件將違泊情況傳送畀警方，仲寸爆咁話會方便到警方，唔使落區執法。

休班警應袋「牛肉乾」抄牌？

依家休班警員可以攜帶警棍協助執法，佢仲建議警務處考慮向休班警派發俗稱「牛肉乾」嘅告票，等佢哋休班嘅時候抄牌，效果實際之餘，亦都係非常好嘅。呢個提議講完之後，公眾席上嘅市民都忍唔住大笑，唔知警方聽到又會唔會接受呢個建議呢？