政情：內會無主席拖到過年新春後擬加開16粒鐘
立法會內務委員會至今已開咗十二次會議，但仍未選出正副主席，停擺超過兩個月，唔少已完成首讀嘅法案審議工作受影響。勞工及福利局局長羅致光日前仲承認「先斬後奏」，意圖將涉及增加四周產假嘅條例草案繞過內會，交付人力事務委員會處理，話擔心法案會喺今屆會期完結前都未能通過，就要推倒重來，但動議最後就因流會而未能表決，唔知今日大會又過唔過到關呢？
泛民又要求收回動議
內會停擺咁耐乜嘢都做唔到，上個立法年度擔任內會主席嘅李慧琼尋日就建議，話嚟緊二月要加開四場特別會議，分別喺五日下午、六日全日及八日上午，合共十六個鐘選正副主席喎，徵詢吓議員係咪能夠出席有關會議，如果日期同時間一旦落（目及）實，秘書處會再通知，但喺泛民不斷拉布嘅情況下，就算加開會議，到時又唔知係咪真係可以選到正副主席呢？
而早前泛民議員已講明唔支持動議，仲要求澄清事務委員會係咪可代替法案委員會，同埋如何根據《議事規則》第54（5）條恢復二讀。佢哋尋日仲聯署致函主席梁君彥，要求收回批准動議嘅裁決添，話動議違反《議事規則》係鐵一般嘅事實，如果佢一意孤行，都要釐清並以書面形式交代動議下法案點樣恢復二讀喎，仲要請法律顧問確認動議如何符合《議事規則》等一系列嘅法律觀點。