政情：黃藍店同遇暴力 何俊賢：都係港人受害
修例風波令到社會嚴重撕裂，唔單止政見唔同嘅人士分為黃、藍兩個陣營，就連食肆同店舖都分為黃店同藍店，更有網民發起「黃色經濟圈」。立法會漁農界議員何俊賢（高佬賢）日前就拍咗條短片，話黃、藍店舖都出現暴力事件，形成咗自己人打自己人，而受傷害嘅都係香港人，佢呼籲持唔同政見嘅人同店舖都要同暴力割席。
籲同暴力割席
高佬賢話大家必須要理解背景，無論黃店、藍店，喺裏面做嘢嘅員工係乜嘢人？都係香港人，所以受傷害嘅係香港人，縱使政見有分歧，都唔應該傾向暴力行為，唔可以畀別有用心嘅人將大家推向愈嚟愈大嘅暴力。佢又直認早前幫襯藍店，話因為嗰間食肆受到好大傷害，去撐吓亦係天經地義。佢認為無論黃店同藍店都應該同暴力割席，咁先至可以和諧溝通，唔通大家喺度溝通緊嘅時候，又掟幾個汽油彈出嚟嘅話，咁點算呢？肯定唔可以再咁傾落去。
依家香港暴亂嘅局面雖有緩和迹象，但佢認為無論政見係黃、藍，喺任何情況下都必須同暴力割席，如果香港想向前走，暴力絕對唔能夠喺香港滋生，呢一點所有有訴求嘅人士，無論黃、藍都必須謹記。