政情：監都坐埋 戴耀廷仲未炒

喺舊年四月，戴耀廷被法庭裁定串謀作出公眾妨擾及煽惑他人作出公眾妨擾兩罪成立，被判監十六個月，其後戴與同案另外被裁定罪成嘅八人均向上訴庭提出上訴，而戴喺監獄服刑約四個月後，獲批准保釋外出等候上訴。

處處維護 解僱要過三關

港大校友關注組、港大教師及職員會同港大學生會評議會大學事務委員會尋日召開記者會，港大校友關注組副召集人麥東榮話，探討充分解僱理由委員會本月內會正式討論應否革除戴嘅教席，因為戴嘅案件仲處於上訴階段，法庭隨時會撤銷控罪，所以港大唔應該喺未完成上訴程序前，就進行任何內部紀律聆訊甚至革職，否則會違反程序公義。

港大校務委員李梓成就話炒戴要過三關，第一關嘅港大「探討充分解僱理由委員會」只係用嚟確認係咪喺戴完成上訴程序前，啟動內部審理解僱程序，之後仲有教務委員會同校務委員會兩關，但就認為點都唔應該革走戴喎。該等組織仲話今日會喺愛丁堡廣場舉行集會，抗議戴未完成上訴，有關委員會就展開內部審訊。

拖足五六年 「依家先嚟講」

對於港大終於展開討論戴炒魷嘅問題，時事評論員陳雲生批評港大太遲行動，明明佔中係五、六年前嘅事，點解「搞咁多風波，依家先嚟講？」作為聞名國際嘅百年大學，港大早就有能力判斷戴嘅去留，拖咁耐只會整衰自己個名。

陳雲生又話雖然戴嘅上訴程序仍然進行緊，但戴嘅行為爭議過大，加上當年佢喺台上高呼「佔領中環，現在開始」嘅一刻已成事實，港大應該一早就終止佢嘅教席，「港大如果識炒一啲行為影響緊幾個至十個人嘅教職員，咁戴佔中影響咗香港七百萬人，點解仲留喺度？」

港大發言人尋日回應傳媒時話校方處理大學成員嘅人事事宜，一向都嚴謹公正嘅既定內部程序，會根據港大條例同其他相關規條跟進個案，但由於過程涉及機密資料，校方唔會就事件作任何評論。

相信打工仔都知公司有心炒人可以好快，但係港大拖咗幾年都炒唔到一個戴耀廷，真係好少見，難怪會令外界產生咁多質疑。