中環出更：何君堯稱冇盲撐警方：企法治嗰邊
反修例示威持續逾七個月，其中立法會議員何君堯嘅行為一直備受爭議。對於有人指佢偏幫警方，何君堯尋日接受電視節目訪問時就強調，自己冇盲撐警方，而係企喺法治嘅一邊。
何君堯喺節目中話，唔會否認有警察執法有錯，認為任何人犯法都要繩之以法。佢又話過去七個月以嚟香港立立亂，認為唔可以盲目支持任何一方，而係要企喺香港人嘅立場嚟睇，同埋企喺法治嘅一方。關於備受爭議嘅元朗七二一事件，佢就話要按法律辦事去調查真相。
唔否認有警犯錯
話說何君堯之前喺立法會大會上，動議譴責民主黨嘅議員林卓廷，指林喺舊年七月二十一號夜晚帶人入元朗挑釁元朗原居民，但有指喺林十點幾到達元朗前，當日下晝已經有白衣人聚集同埋有人畀白衣人打。何話，雖然十點幾前發生嘅事唔係林挑釁，但唔代表之後發生嘅事林冇份挑釁。何又話當日下晝佢喺港島食飯，所以佢對三點幾元朗發生乜嘢事並唔知情。
卓妮