中環出更：嚴志明：港漫揚名國際 要加普世元素
近日有兩部行走於港島區嘅電車，分別進駐「老夫子」同「哨牙珍」兩位乘客，而喺富明街同百德新街兩個電車站，亦出現三十多位港漫角色。呢種令人眼前一亮嘅布置，係香港設計中心聯同香港動漫聯會嘅傑作，目的係向大家展示香港充滿童趣嘅一面。
香港設計中心主席嚴志明自小喺理髮店接觸大量漫畫書籍。佢話港漫題材勝在夠地道，就算隔咗一段時日再重溫，照樣回味無窮。不過，港漫要做到國際揚名，佢認為應該嘗試加入一啲普世元素，以此惹起唔同文化背景讀者嘅共鳴。
溫紹倫：以前漫畫家無錢先開工
香港動漫聯會副會長溫紹倫（Alan）憶述小學時代睇漫畫要等好耐，事關當時嘅漫畫家比較懶散，通常係去到近乎無錢開飯嘅時候先開工繪畫新一期作品，但後期漫畫家就變得積極好多。
Alan話四十幾年前嘅功夫電影掀起一片熱潮，港漫內容亦隨之出現拳來腳往嘅場面，社會輿論擔心港漫傷風敗俗，政府於是以不良刊物條例去規管，而漫畫家就改為出版表面係報道娛樂消息，內頁實質係漫畫連載嘅報紙，漫畫家從此不但勤於伏案工作，亦招聘咗大量人手，從而培育唔少新秀，開創日後港漫嘅黃金時代。佢話呢種對策可見港人靈活變通嘅能力，不容小覷。
甘小文：故事先係漫畫嘅靈魂
漫畫家甘小文創作嘅漫畫人物亦成為今次展出之列。佢認為漫畫作品要引人入勝，首要係故事橋段，若果情節空洞嘅話，人物縱使精緻，都只係冇靈魂嘅角色，而佢嘅漫畫創作生涯中，亦常為度橋費煞思量。
當日唔單止有漫畫家出席，仲有專程到場布置遊樂空間嘅英國設計師Camille Walala，而香港設計中心業務發展及項目總監林美華認為，將港漫人物置於公共空間以營造遊樂場嘅氣氛，可以為平凡嘅生活增添趣味。
卓妮