湖北武漢爆發新型冠狀病毒引起嘅肺炎，更有死亡個案，但後知後覺嘅港府就未有公布進一步防疫措施。香港大學感染及傳染病中心總監何栢良尋日形容新型冠狀病毒係沙士「親戚」，病毒可能蓄勢待發，趁農曆新年「登上」飛機同高鐵，增加傳播風險。佢仲強調病毒係唔會等人，唔可以等到病毒殺到埋身先出招，要及早做好預防措施同諗定應變計劃。查實何幾心急，甚至向當局獻計都冇用，事關食物及衞生局局長陳肇始做嘢一向都慢幾拍，要等陳做嘢，希望唔使等到寶劍生銹變廢鐵啦。
