政情：八網難逃：李華明買西蘭花 撐殘障者籌款
旺角花墟早前搞咗個本地漁農美食嘉年華，前立法會議員李華明（Fred）都有去幫襯，見佢手拎一大棵菜，舉起大拇指，笑得好開心添。
漁農美食嘉年華 行足十幾年
問番阿Fred究竟嗰棵係乜嘢菜，佢就話其實係西蘭花嚟嘅。佢係喺煤氣公司慈善義賣嘅攤檔買呢棵菜，事關煤氣公司喺新界有個農場，種植咗啲農產品，呢日就帶到現場賣，籌到嘅錢會用嚟幫助傷殘人士。而佢自己仲有買咗番茄仔等帶番屋企煮嚟食，用咗大約二百元。
阿Fred又話現場好多人，都幾旺場，之前佢年年都會嚟，大大話話都行咗十幾年喇，佢仲係立法會議員時已經嚟做主禮嘉賓，依家就自己一個嚟行吓，幫襯吓，仲見到唔少以前漁農自然護理署嘅朋友添。