政情：丁江浩促睇實區會經費 反被趙家賢翻舊帳
去年區議會選舉民主派取得大部分議席，喺區選中角逐連任失敗嘅民建聯前東區區議員丁江浩（Eddie）日前撰寫文章，提到擔心反對派會浪費區議會經費，促請政府必須加強監管區議會撥款運用，點知隨即就被民主黨東區區議員趙家賢（Andrew）翻舊帳。Andrew批評Eddie喺鰂魚涌加裝「不能避雨亭」，呢啲先係真正嘅浪費公帑，但依家竟然仲衝出嚟話要監察區議會公帑運用，真係笑爆嘴喎。
Eddie原本喺文中講到，新當選嘅反對派上台後利用區議會作政治舞台，獲取更多政治利益，但所用嘅區議會資源係納稅人血汗錢，故此就認為要時刻監察反對派區議員一舉一動，以免區議會淪為反對派政治舞台，搞到無法推動地區經濟、改善民生。
嘲「不能避雨亭」先係浪費公帑
Andrew冇耐就喺社交平台鬧爆Eddie，形容對方文章係「是日笑話」，皆因對方二○一五年建議喺區內興建「不能避雨亭」，質疑係咪忘記咗自己先係浪費公帑設立「騎呢」避雨亭嘅始作俑者，建議不如監察咗自己先喎。
#