政情：蕭偉強同太太去台灣食好嘢
近期撞正台灣大選嘅日子，香港唔少政界人士都專程飛過去考察，勞工及福利局前局長蕭偉強（Stephen）同太太都唔例外，去睇大選順便食好嘢，兩人除咗去食養生無老鍋之外，亦去咗台北市大安區一間法式餐廳歎「Fine Dining」晚餐，花費六百元港幣，但Stephen就話菜式係二千元嘅質素，真係物超所值喎。
休閒Look冇打扮 最緊要開心
Stephen提到，佢同太太喺餐廳好突出，因為佢哋當晚只係着休閒服，兩人嘅衣着同樣有紅色，配搭好似過農曆新年，而餐廳內都係一對對嘅妙齡情侶，黑白配盛裝出席，但點樣打扮都好，最緊要食得開心。
Stephen又話，佢訂咗一間日式料理餐廳，總店位於日本銀座，兩年幾前落戶高雄，去年擴展至台北，南韓人師傅由總店、高雄到台北都親自為佢哋下廚，Stephen仲推薦餐廳畀網友，叫佢有機會都可以試吓。