政情：香港眾志跪低 組織宗旨刪「自決」
喺過去選舉當中，香港眾志嘅參選人都被選舉主任取消參選資格（DQ），唔止成員周庭二○一八年打算參加立法會港島區補選被DQ，去年區議會選舉身為秘書長嘅黃之鋒亦都被DQ，當時選舉主任指出香港眾志組織宗旨中嘅「民主自決」有違《基本法》同一國兩制原則。香港眾志喺接連有成員參選被DQ後終於跪低，尋晚就喺社交網站發聲明，指組織已經喺本月八日召開成員大會，通過決議更改組織章程，將組織設立嘅宗旨「推動香港民主自決」改為「推動香港的民主與進步價值」，刪去「自決」字眼。
屢被DQ 網民質疑為參選鋪路
聲明又話，是次綱領改動將更概括闡述香港眾志嘅工作方針同計劃，仲話會聚焦喺強化公民社會、團結民主力量同推動進步價值。佢哋嘅聲明一出，唔少網民留言，質疑佢哋刪去「自決」字眼，同泛民有咩分別；甚至有人話佢哋為咗入議會、為咗參選，真係咩都做得出。不過雖然香港眾志跪低，但係咪成功洗底，今年九月立法會選舉倘若佢哋派人出選，到時就自有分曉。