中環出更：下月又抱孫 馬時亨春風滿面
曾任商務及經濟發展局局長嘅馬時亨離開官場後加入港鐵，去年六月卸下港鐵主席職務。自稱「無官一身輕」嘅佢，尋日現身中環國際金融中心商場外。見佢一個人行街，精神飽滿。佢就話，佢個二女下個月將會誕下女兒，換言之佢又再抱孫。果然係人逢喜事精神爽喇。
手機「牆紙」用四個孫嘅相
因為即將迎接小生命降臨，即使新春假期呢個外遊季節即將到來，馬時亨都唔會離港旅遊喇，佢話要一家人一齊陪住二女咁話。問到佢係咪要忙住煲薑醋，佢就話「搵人搞」喎。咁又係，依家都有唔少相關嘅服務，真係方便好多喇。
馬時亨已經有四個孫仔孫女。講起啲孫佢就好開心，係咁話啲孫好得意，依家佢仲連電話手機嘅「wallpaper（牆紙）」都係用四個孫嘅相。佢之前都話過，有時打開電話見到啲孫嘅相，就會乜嘢壓力同唔開心都消除晒。而且依家用手機影相好方便，影完可即刻設定做手機wallpaper不時細味，唔同得以前咁，同兩個女兒影相冇咁方便，只能用記憶去留住喎。
卓妮