中環出更：倪龍妹去旅行順便踩線 發掘餐廳酒店
香港人一向都鍾意去旅行，如果唔跟團，選擇自由行嘅話，出發前就要搜集資料計劃行程。早排有旅行社搞周年酒會，出席嘉賓有香港教育工作者聯會會長黃均瑜同太太香港東區婦女聯會常務副主席何艷桃，及旅行社高層董事兼總經理倪龍妹（Mary）。Mary話，佢大多數都係自己去旅行，好少跟團，而且去玩嘅同時仲會順便「踩線」添。
親身試過合格 再推薦畀客人
究竟Mary做乜要去踩線呢？佢就解釋係要去發掘當地嘅餐廳、酒店同交通設施，例如餐廳膳食同衞生問題，酒店同交通配套係咪方便等，連酒店房間都要親身去瞓吓張床，試吓啲枕頭好唔好瞓，整體合格先納入行程，推薦畀客人喎。真係夠晒認真。
唔止Mary，黃均瑜去旅行亦多數都係自己去。黃話佢一年去一、兩次左右，多數都係坐郵輪，不過佢都會睇吓跟乜嘢航線，搵吓上岸去邊度玩嘅。佢又話，坐郵輪勝在船上多嘢食，又有唔同娛樂設施。不過佢就試過計劃行程唔合老婆心水，好彩都係小問題，大家都玩得好開心。
譚兆炳鍾意跟團 自己唔使煩
出席酒會嘅仲有香港國術總會名譽會長施家殷同香港華仁書院榮休校長譚兆炳。施話佢去旅行鍾意自己組團，湊夠十幾廿人就交畀旅行社，安排當地導遊帶佢哋去玩，一來行程可以自己話晒事，二來時間可以有走盞，同埋成團都係自己人，好玩好多。譚就鍾意跟團多啲，佢話因為做校長時好多時都帶學生去外國交流，都幾辛苦，依家退休去旅行就想舒舒服服，跟團就最好喇，有人安排去邊度食同去邊度玩，自己唔使煩。
卓妮