政情：九巴金公主伍穎梅加入婦委會
有「九巴金公主」之稱嘅伍穎梅（Winnie）嚟緊會多一個身份，因為政府尋日公布，委任包括Winnie在內嘅三名新成員加入婦女事務委員會（婦委會），任期由下周三（15日）開始，為期兩年。而本身已為婦委會主席嘅前立法會議員陳婉嫻（嫻姐）同前沙田區議員龐愛蘭（Scarlett）亦都再度被委任為委員會主席同成員。唔知新成員加入，會否擦出新火花喇。
嫻姐亦再被委任
今次被委任為婦委會新成員嘅唔止有Winnie，仲有臨床心理學家胡潔瑩，同埋東華學院校長兼人力資源規劃委員會委員呂汝漢。再度被委任嘅成員就有嫻姐、Scarlett、李錦霞、蔡曉慧、黃何淑英同醫生蘇潔瑩，至於成員洪雪蓮、鄧銘心、關蕙就即將離任。
勞工及福利局局長羅致光就話，剛獲委任同再度委任嘅成員來自唔同背景，喺業界同社會服務方面都擁有豐富經驗，期望佢哋為婦委會嘅工作提供寶貴意見咁話。