政情：開12次內會未選出主席 何啟明轟泛民荒謬
立法會內務委員會尋日召開第十二次會議以選出正、副主席。不過一個半小時會議時間過去，依然仲未有任何進展。勞工界立法會議員何啟明就鬧爆一直拉布嘅民主派，喺內會嘥足三個月時間，都仲未選出主席，簡直係荒謬。佢之後仲去信內會，要求盡快選出新一屆內會主席，並且應優先處理有關延長產假至十四周嘅法案審議工作。
審議增產假或要由頭嚟過
與何同屬工聯會嘅立法會議員麥美娟都話，依家一再拖延選舉主席，將會影響審議增加產假法案嘅工作，假如本屆會期內仍未選出主席，法案就要喺下屆立法會由頭嚟過，重新經過漫長立法程序，佢唔想臨門一腳先至功虧一簣咁話。而議員陳克勤亦都鬧爆，話本年度會期已經過咗成三分一，但整個議會就一事無成，又建議考慮加開會議處理積壓議題，以加快會議進展。
民主派議員譚文豪就話，查實民主派都支持增加產假，呢點係冇爭議，無人想條法案唔過喎。不過市民眼睛好雪亮，信唔信佢講，相信市民自有分數喇。