政情：被指着短裙唔莊重 陳詩雅盼以實力平反
新一屆區議會有唔少政治素人彈出，新任嘅元朗區議員陳詩雅（Hermine）作為素人，就曾經有街坊對佢嘅衣着打扮同行為舉止有意見，甚至叫佢剪短頭髮同埋唔好着短裙。Hermine就話會直接同街坊解釋衣着同議政能力係冇關係，仲揚言要做出實際成績，認為用實力說話，係平反自己嘅最好方法。
曾半夜收電話短訊騷擾
Hermine就發覺近年街坊對女性從政者嘅要求相對嚴苛，例如同其他友好人士一齊擺街站時，如對方係女仔，喺街站稍微放鬆少少，就會有街坊認為係唔夠專業。而佢本身鍾意着短裙，但就試過被街坊話係唔太莊重、唔貼地，建議佢着長裙、西裝或運動套裝，咁樣先唔會有柔弱感覺喎。
講起區議會選舉曾有女候選人受襲，佢就話曾經喺半夜收到電話或短訊騷擾，不過因為係公眾人物，所以都冇辦法。被問到會否學武保護自己，佢就話都有人建議過，但都唔係一時三刻可以練到，所以依家主要都係靠搵義工同街坊陪，以人海戰術去擊退想搞事嘅人喇。