政情：口罩反轉戴 柯創盛遭黨友恥笑
武漢近來爆發肺炎，本港亦有懷疑個案，令市面上口罩出現搶購潮，真係「一罩難求」。立法會議員柯創盛（柯仔）尋日喺立法會討論肺炎疫情事宜時，就戴埋口罩嚟發言，批評政府連防疫物資都供應不足，點知就將個口罩反轉嚟戴，做咗個完美嘅「錯誤示範」。
或漏罅削劏飛沫功效
一般外科口罩有分正面同背面，正確戴法係將深色向外，不過柯仔尋日就將淺色嗰面向外。衞生服務界議員李國麟話，雖然口罩不論底、面都可阻隔到飛沫，之不過掉轉嚟戴可能會漏罅，減低阻擋飛沫功效，形容情況「好似將件衫反轉嚟着，唔fit之餘仲浪費咗件靚衫」。佢仲提醒買口罩要買啱面形，否則就算用N95都冇用，只係嘥晒啲錢。
柯仔戴錯罩後收到唔少朋友提醒，於是就同黨友、立法會議員葛珮帆拍片解釋自己因為緊張先戴錯，又示範正確嘅戴口罩方法。不過佢段片一出街，其黨友兼議員陳恒鑌同鄭泳舜就喺立法會會議廳邊睇邊笑，真係黨友都冇面畀。