政情：被斥黃到入骨 黃繼兒撲出來反擊
一名警員上月廿六日喺鏡頭面前展示一名記者嘅身份證，引起社會關注。私隱專員黃繼兒翌日已立即回應，話雖然未收到當事人投訴，但涉事警員嘅行為表面上已可能違反私隱保障原則，個人資料私隱專員公署有足夠理由展開主動調查。點知黃嘅言論就受到質疑，被人寸佢「撲出來」執法、「選擇性」地「打壓警方」、「高調地」採取行動同「小題大做」，甚至形容佢「黃到入骨」。
不認同手指拗出唔拗入
黃尋日發表聲明，話畀人咁話法佢可以理解，但希望投訴人都記得佢之前亦曾「撲出來」主動調查違法佔領行動發起人戴耀廷喺特首選舉前所舉辦嘅「偽公投」，同立法會議員許智峯於立法會涉搶手機事件，亦都曾喺網上主動巡查涉及警員同家屬被起底等。
黃又話，佢咁做只係考慮到身份證涉及敏感個人資料，當時被拍下或展示，加上傳媒及社會大眾關注，向涉嫌違規嘅資料使用者行使主動調查權係職責所在，正常合理。對於有意見認為佢不應「手指拗出唔拗入」，佢就實在不敢苟同喎。